3Jo | MEK | STEP |

3 Ioane Ioane Ega Malele Oiso Auga

3 John

1 Lau iifi e'a au akaiki'au aga'o malele i'ina, ekefa'auagai Kaius eemuai laulaisa. Ke oi auga Deo ega iifa ko'a auga lopako'ania kainai, lau alou ko'agai oi animu laani.

2 Ekefa'auagai, lau Deo lamegamega penia ega koa oi foloisafa alogamai foagu laoma. Ke Deo maagai oi alomu felo ipauma koa i'opoga, oi emu agu isafa felo femia laoma. 3 Lau alou egama alogaina, gome aa'a aki'a Kristiano papiau'i isa'i kemai, oi alomu ko'agai Deo ega iifa kainai lopea auga fouga maauai keifania. Ke oi aufa kina Deo ega iifa ko'a auga agugai ala loagu oma auga isafa fouga maauai keifania. 4 Lau kapa aga'o alou aepagama alogaina kai, lau gau iifi e'a papiau'i Deo ega iifa ko'a agugai keagu auga a'o lalogo alou epagama alogaina.

5 Ekefa'auagai, oi alomu ko'agai emu pinauga lokapa, aa'a aki'a Kristiano papiau'i alologoni'i mo ganinagai, eemu kefai aisama, felo mo ee'iai lokapa lopalagaini'i. 6 Ke oi alomu ko'agai isa ani'i loani lopalagaini'i auga, kemai inae iifi e'a papiau'i maa'iai keifafoua. Oi Deo anina eani Isa ega pinauga au'i ala fopalagai oma'i eoma auga, laoga mainai fopalagaini'i kai foulai'i fekelao. Ega'ina alokapa aisama, laomai felo alokapa. 7 Gome isa Iesu aka kainai kepealai kepinauga mo ganinagai, Iesu akepako'ania papiau'i ee'iai pipalagai aga'o akeafia. 8 Ega puo i'a papiau ega koa'i au'i gafegafe akaiki'a fapakina'i fapalagaini'i, ega koa fou kai'alao Deo ega iifa ko'a faifafoua, ke pinauga fakapa.

9 Lau Kristiano papiau'i fau'iai malele aga'o lapapua, iifi e'a ega'ina papiau'i ee'iai laulaisa. Kai Diotrefes anina eani ifo akaiki'a gamia eoma auga, lai au akaiki'amai ainamai aeafia. 10 Ega puo lau oi eemi alafai aisama, isa kapa'ina ekapa iifa apala'i eifani'i ninimai e'anina au'i ma'oai alaifafou'i. Ke isa ega'ina ekapa alo aekaina koa, Kristiano papiau'i eega kefai au'i aegafegafe peni'i aeifa koko'i. Ke isa iifi e'a papiau'i isa'i Kristiano papiau'i ega'ina kegaifa koko'i keoma au'i isafa epaapakipo'i, ke iifi e'a alogai epapealai'i.

11 Kai ekefa'auagai, oi auga papiau kapa'ina apala kekapa auga folokapa kai, felo kekapa auga mo fokapa. Gome kaisau laomai felo ekapa auga Deo gauga kai, kaisau laomai apala ekapa auga Deo aelogonia. 12 Papiau ma'o Demetrius auga au felo keoma. Ke isa Deo ega iifa ko'a auga isafa kainai epea. Ke lai isafa isa au felo auga aifafoua. Ke oi lologo lai Demetrius faagagai kapa'ina aifania auga ko'a paisa.

13 Lau nini'ani ma'o kekae faifani'i kai, anina alaani maleleai fapapua'i. 14 Kai lau anina laani auga, fafiakoa faafai eemiai kua'a maa'a faisa kai fou fanini'ani laoma. 15 Ke lau lamegamega ega koa Deo ega gagao eemuai feka laoma. Ke oi ekefa'amu inae au'i oi kepamegonimi. Ke lau e'u pamego i'a ekefa'a'a aga'o aga'o egae fou oague au'i fopeni'i laoma.